Астанада дәрі-дәрмекпен қамтамасыз ету саласындағы ынтымақтастық жөніндегі халықаралық сараптау сессиясы өтті

30.05.2024

 

Іс-шараға ТМД қатысушы мемлекеттерінің парламенттері, салалық министрліктері және ведомстволары, ұлттық ғылым академиялары, халықаралық ұйымдарының, фармацевтикалық қауымдастықтары мен компанияларының өкілдері қатысты. Кездесудің негізгі тақырыбы әлеуметтік маңызды аурулардың алдын алу, диагностикалау және емдеудің тиімділігі мен қолжетімділігін талқылау болды.

Сессияға қатысушылар фармөнеркәсіптегі мемлекеттік-жекеменшік серіктестік шеңберінде дәлелді медицина технологияларын тиімді енгізу мақсатында ТМД қатысушы-мемлекеттерінің денсаулық сақтау саласындағы ұлттық дәлелдеу базаларын құруға және дамытуға ерекше зейін қойды. Кездесуге қатысушылардың сөзі бойынша, дәлелденген қауіпсіздік пен тиімділік қағидаларында құрылуға тиісті Достастық елдеріндегі дәрі-дәрмекпен қамтамасыз ету жүйесін жетілдіру мәселесі маңызы аз емес күйінде қалады. Конференцияның сараптау сессияларының бірінде сөз сөйлеген Дәрілік заттар мен медициналық бұйымдарды сараптау ұлттық орталығының бас директоры Еркен Даутбаев Қазақстан Республикасы аумағындағы дәрілік заттар айналымына рұқсат ету талаптары және елдегі реттеу жүйесін жетілдіру шаралары туралы толық әңгімеледі. ДЗ мен МБ СҰО басшысы конференцияға қатысушылар назарын дәрілік заттарды ЕАЭО қағидалары бойынша тіркеуге ауысу шеңберінде жүргізілетін жұмыстарға да аударды. «Сонымен, 2026 жылғы 1 қаңтардан бастап,  ЕАЭО талаптарымен сәйкестікке келтірілмеген жағдайда ұлттық заңнама бойынша берілген дәрілік заттардың тіркеу куәліктерінің әрекет ету күші жойылады. ЕАЭО мүше-мемлекеттерінің бәрінде сәйкестікке келтіру жұмыстары өте баяу жүріп жатқанын атап өту қажет. Ауысу кезеңінің аяқталуына дейін бір жарым жыл қалғанын есепке алсақ, дәрілік заттар тапшылығының туындау қаупі бар», - деп қосты Еркен Даутбаев. Спикердің сөзі бойынша, өкілетті орган сараптау ұйымында тіркеу куәліктерін сәйкестікке келтіру үшін фармбизнеске көмек көрсету мақсатында Жол картасын жасады, бұл өтінім беру үдерісін автоматтандырудан тіркеу куәлігін алуға дейін ЕАЭО бойынша дәрілік заттарды тіркеу порталында жүзеге асады, сонымен қатар ЦДИАӨМ  ұлттық шлюздің өткізу қабілетін арттыруды және тіркеу куәлігін ХМL-үлгісіне ауыстыруға арналған бағдарламалық қамтылым әзірлеуді қарастырады.

Конференция соңында шараға қатысушылар қазақстандық тарапқа кезекті сарапшылық сессияларын өткізу алаңдарын ұйымдастыруға және ұсынуға көрсеткен көмегі үшін алғыс айтты, сондай-ақ «ТМД қатысушы-мемлекеттеріндегі дәрі-дәрмекпен қамтамасыз ету туралы» модельдік заңын дайындау шеңберінде салалық әдістемелік нұсқаулар мен механизмдерді жасау жөніндегі әріқарайғы  жоспарларымен бөлісті.

Алдағы уақытта IV сарапшылық сессиясы 2024 жылғы 28 қарашада Өзбекстан Республикасының Ташкент қаласында өтеді.                                     

Анықтамалық:

Конференциялар ТМД Парламентаралық ассамблеясының 2022 жылғы күзгі сессиясында бекітілген 2023-2025 жылдарға арналған ТМД-дағы Модельдік заң шығарудың келешек жоспары шеңберінде көзделген «ТМД қатысушы-мемлекеттеріндегі дәрі-дәрмекпен қамтамасыз ету туралы» модельдік заңын әзірлеу аясында ТМД Парламентаралық ассамблеясының кеңесі хатшылығының бастамасымен өткізіледі. ТМД Парламентаралық ассамблеясы ТМД мемлекетаралық органы болып табылады және қатысушы-мемлекеттердің парламенттік делегацияларынан құралады. Делегациялар өкілдерін ұлттық парламенттер тағайындайды немесе сайлайды.