GDP және GPP сертификаттары тапсырылды

Былтырғы жылдың желтоқсан айында халықаралық стандарттарға сай келетін дәріханалар мен дәрі-дәрмек қоймалары тексерілген болатын. Инспекцияның сараптамасы анықталып, тексеріс нәтижелері Мемлекеттік санитарлық эпидемиологиялық бақылау комитетіне жіберілген. Нәтижесінде шаһарымыздағы 4 дәріхана мен 1 дәрі-дәрмек қоймасына GDP (Тиісті дистрибьютерлік тәжірибе) және GPP (Тиісті дәріханалық тәжірибе) сертификаттары тапсырылды.

Сараптама қорытындысының негізінде, «Тиісті дистрибьютерлік тәжірибе» сертификатына «INKAR» ЖШС дәрі-дәрмек қоймасы, ал  «Тиісті дәріханалық тәжірибе» сертификаттарына «АПТЕКАПЛЮС» ЖШС, «Аптека №2» ЖШС, «Жайық-АS» ЖШС және «№84 дәріхана» ЖШС дәріханалары сәйкес деп танылды.

Бұл халықаралық стандарттарға сай келетін компаниялардың алғашқы ұшқындары десек болады. Бастапқыда ерікті сипатта болған бұл шара алдағы уақытта міндетті талаптардың біріне айналады. Аталмыш жиынға ҚР ДСМ «Дәрілік заттарды, медициналық мақсаттағы бұйымдарды және медицина техникасын сараптау ұлттық орталығы ШЖҚ РМК, сонымен бірге дәрі-дәрмек айналымындағы медициналық мақсаттағы бұйымдар мен медицина техникасы аясындағы фармацевтикалық Ассоцияциялары мен компанияларының өкілдері қатысты.

Медициналық және фармацевтикалық бақылау комитетінің Алматы қаласы бойынша департаменті конференцияны тек сертификаттарды тапсыру үшін ғана емес, сонымен қатар, фармацевтика саласы өкілдерінің алдында жылдық есеп беріп, алдағы жоспарларымен бөлісу мақсатында ұйымдастырған. Сол себепті, конференцияның жалғасы бірқатар баяндамаларға ұласты.

— Қазақстан мен Ұлыбританияның тәжірибелері салыстырмалы түрде қарастырылды. Ұлыбритания мемлекеті GMP (Дәрілік заттарды өндіру ережелері) стандарттарына  сәйкес жұмыс істейтіндіктен, ол жерде дәрі-дәрмектердің тіркелуі оңайға түседі. Ал, Қазақстанда бұл жүйеге тіркелу 2015 жылға жоспарланып отыр. Бүгінде фармацевтика саласындағы мәселелердің бірден-бір шешімі – дәрілік бұйымдар саласына міндетті түрде GMP стандарттарын енгізу деп білемін. Жалпы сол GMP-дің енгізілуін отандық кәсіпорындар үшін 2014 жылдан бастап енгізген жөн. Фармацевтикалық кәсіпорындардың сапалы әрі тек мемлекеттік тіркеуден өткен дәрі-дәрмектерді ғана жеткізіп отырулары үшін бұл мәселені қайта қарастырған дұрыс болар еді. Екінші шешімі – Еуро Одақтың лицензиясы бар компанияларды жеңілдетілген түрде тіркеу, – деді ҚР ДСМ медициналық және фармацевтикалық қызметті бақылау Комитетінің басшысының орынбасары Пак Лариса Юн-Бойевна.

Отырыстың барысында фармацевтикалық кәсіпорындардың өкілдері өздерін мазалап жүрген сұрақтарын қойып, тиісті шешімдерін тапты.  Медициналық және фармацевтикалық бақылау комитетінің Алматы қаласы бойынша департаментінің директоры Айзат Балтағұлқызы фарм компаниялары мен департаменттің арасындағы түсініспеушіліктерді жою мақсатында осы іспеттес конференцияларды жиі өткізудің маңызы зор екендігін айтты. 2012 жылдың қорытындылары жасалды, алда 2013 жыл. Биылғы жыл дәрі-дәрмек саласындағы жағымды жаңалықтар мен алға тартуларға ұлассын!

«Фармация Казахстана» журналы